二零零八年六月一日(星期日) 晴

昨晚一口氣 send 了接近十封 Application letter, with nearly the same resume and cover letter. send 了後來很睏, 又煩又厭, 每一封都很求其........ 為什麼生活中那麼多挫折呢? 聽智者說, 挫折是磨練, 教人成長。好吧, 既然如此, 我不會放棄的。再努力一些吧。不知道自己在忙甚麼, 好像每天都很忙, 很多事情要幹, 但最重要的 FYP, IETS, 甚至Internship Application, graduate offer preparation 都未能做得好。我的時間管理太差了!!

大朝早起床去了打籃球, 岑西比我準時, 原因是他以為約八點.........我跟他射波射了大概半小時, 小白跟昇就來到了(@九點)...。我們百無聊賴地玩籃球遊戲, 最後見無其他人來, 決定二打二。不一會, 我已經汗流浹背、氣喘如牛。Simon 來到, 其後甘國銳也到了 (我猜當時已將近九時三十分, 但我其實約八時三十分) , 我們終於可以三打三。我竟然同波王王文達一隊, 仲有神童昇, 基本上打波無難度。我一直行行企企, 不太認真, 一來自己體能差, 跑兩跑就面紅心跳氣喘; 二來也不想受傷, 故極其頗廢。但倚仗兩位可靠的隊友, 一直無輸過波。

其他人陸陸續續的到來, 我開始考慮下次約八點, 自己就九點來.......不過小白話其實一樣, 人要遲到總會遲到, 佢要十點黎, 你約幾早都無用。佢有 point! 兩位正氣聚頭, 奕華正氣堪稱人中之龍, 籃球之霸, 他在球場上飛來插去, 無人能擋。球賽前半部我都 一貫的 hea 下 hea, 但到後來佢變本加厲, 連續轟入數球, 個個目瞪口呆, 於是我認真起來, 不過都係守佢唔住, 最後與小白二夾一才箝制到佢, 最後一分打了好耐。可惜俾 Chee Chee 轟入天外金球結束場球賽, 終於輸番一場。我事後檢討, 是因為我一開始防守佢時太 hea, 到後來分數拉遠了就好難追。加上打了太多場, 實在很累。

我不明白為什麼自己身體可以有咁多鹽分, 件衫濕透了, 臉上的汗水跑入眼睛, 流入嘴巴, 都感覺到鹹分。難道我身體可儲很多鹽分嗎?我這天打了一場半認真的球賽, 半場對奕華正氣, 一場對天外來客.........竟然敢踩場!?!?!? 抱歉的是, 我外圍完全唔準, 唯有籃底屈機, 屈到佢地好無隱。唉, 我都好無奈, 亦有點內疚感, 不過我球技咁屎都無辦法..................只可以承認自己廢哂武功, 離中七高峰期愈來愈遠..........大碌金非常積極, 又跑又射又搶, 我懷疑佢的精力邊度黎.......小白神技一顯再顯, 全靠佢先可以連勝咁多場。另一位 N 年無見過的浩然正氣朋友, 佢渾身正氣地穿著長褲出現, 衝勁地打波, 衝勁地舊患發作, 受傷後又衝勁地打波。點解可以咁衝勁? 佢防守好好, 射波亦準(準我好多)。

最後一場四打四簡直累得不得了, 感覺身體好沈重, 無力跳起, 又跑唔到, 只好在籃底行黎行去等運到。大碌甘盡情狂奔, 在場上奔來奔去, 點解可以咁衝勁? 奕華正氣在場上如一條龍般飛來飛去, 點解可以咁衝勁? 好彩有大碌甘防守奕華正氣, 隊中已沒有人能跟到佢的速度。沒有海牛在場, 在籃底下輕鬆很多。說起來, 又有人放飛機唔黎, 而且唔止一人。今次我原打算不打電話去催佢地, 任佢地幾時黎就幾時黎, 費事畀人臭罵, 但最終都打了去....佢地的留言信箱。

事實是兩位放人飛機的朋友不斷有人問侯, 「佢幾時黎?」我點知呢? 「佢黎唔黎家!」我更加唔知, 不過你見佢電話都無打黎你應該就知佢會唔會黎啦?!? 我沒有約某位清晨臭罵我的朋友, 奇怪的是/果然 沒人問起佢, 我發覺其實一直都係我自己一廂情願地想將他加入個圈子, 其他人似乎一早留意唔到佢的存在。

完事後急急返家洗一個舒服到痺的澡....除衣服時件衫仲因太濕而緊緊貼在身上除唔到......洗完澡後我發覺自己走路都好勉強, 但問題是我必須立即開電腦上網抄中二數學雜作俾個補習學生(前幾日又唔做...) 我抄抄抄, 仲要抄下答案, 防止佢唔識問我時可以回應佢。抄完急急出門, 去到見唔到個靚太, 有點失望, 跟住開始補習, 佢問我一條數學, 我計唔到........佢答錯一條題目, 我指出錯誤, 佢反駁話無錯, 我信以為真, 仲有尷尬, 但原來我才是對的.....唉, 數學。我 hea 了好多時間俾佢做練習同講作文佢聽, 最後算過關...不過佢居然俾功課我做, 叫我幫佢睇數學習作......回家有排搞........臨走靚太出來畀錢我, 仲同我講了很多佢個仔的瘀野, 搞到佢發脾氣。一講就講了半小時, 如果唔係靚太, 等二個我一早走了。佢最後仲唔好意思前唔好意思後, 話補錢俾我, 我仲懶瀟灑話唔駛.......事後有點後悔............補後, 我累得不得了, 趕快回家休息。

去到西鐵站, 我忍不住在零食店買了令人懷念的「維也納腸」同一條「辣肉腸」。我記得以前小學時自己好鍾意食佢, 但當時沒有零用錢, 所以如果小息時好不容易買了一條就會樂在其中地咬食, 非把整條都食得乾乾淨淨不可, 連張橙色皮都不放過, 非要連一點肉粒都看不到為止。吃「維也納腸」同一條「辣肉腸」要用剪刀剪開條腸個頭, 但當其時我沒帶剪刀, 我在西鐵走回家途中迫不及待地用小學時的方法 - 用口咬開佢, 再用口吸佢的肉出來, 吸到吸不出來後就用手用力推那些肉出來。有點怕別人見到, 不過腦海中有好多快樂的回憶湧現。小孩子總是最容易滿足的, 不過現在的小孩子就.......
我個小四學生有電腦, 有 GameBoy Colour, 有手電, 有無數故事書, 有電子字典, 有好多好多玩具, 佢去過海洋公園唔止一次, 又去過迪士尼樂園, 佢阿爸仲話如果佢考試考得好買 NDS 畀佢......so 佢又懶又蠢又百厭, 難為佢阿爸咁叻.....我的童年簡單, 但很快樂。難為我祖母父母對我如此容忍, 如果我將來個細路係我以前咁百厭, 或好似個小四補習學生咁驕縱 , 我要佢求生不得, 求死不能, 我要用體罰令佢對自己的行為負責, 令佢知道甚麼是對, 甚麼是錯, 而且物質生活將會極其簡單, 教佢金錢的正確用法......智者話:「你條xx結到婚先算啦」又口岩。

睡覺, 累了。